1Cor 6 | KMG | STEP | Ŋoŋeraonec moczi âgo-ticnere bahacdâŋ bajuocmu, e dâŋ i mitiŋic jaŋerao mi rârâe ŋic miti tâmiric jaŋerao râeme sâckeocmu me?

1 Corinthians 6

Dâŋ bahac-jeŋic fuame jaŋac mi mutarambiŋ

1 Ŋoŋeraonec moczi âgo-ticnere bahacdâŋ bajuocmu, e dâŋ i mitiŋic jaŋerao mi rârâe ŋic miti tâmiric jaŋerao râeme sâckeocmu me? 2 Mitiŋic nâŋâc juku miti tâmiric jaŋere dâŋ mutaranaŋmu, i mi manaŋgopieŋ me? Me juku gie iŋucne baniŋte muŋarekicnezi ŋaŋacne dâŋ jawane fuame sâcne mi mutaraniŋmu me? 3 Nâŋâc aŋelo jaŋere dâŋ wâc mutaranšoŋgopeneŋzi wiac omanere dâŋ fuame wemocko bititienaŋmu. 4 Wiac omanere dâŋ fuame ŋoŋe wemocte kikefuŋzi mana-jareme wawahane eekac ŋic iŋucne jaŋerao barapie mutara-ŋareeŋgopieŋ? 5 Ŋoŋe dâŋ i manapie miminehec eocte ŋazakopac. Ŋoŋerao ŋic maŋɋârâŋhec moc mi jukac me? Eme dâŋŋeŋic fuame erao barapie mutiŋne-ŋarezac. 6 Ŋoŋe ine iŋuc mi eeŋgopieŋ, aricne, miti mamana moczi âgo-ticnehec dâŋbahac-jekic fuame miti tâmiric jaŋerao barame mutara-jacteniŋmu.

Sâqocne bapazi sambâŋko fefene i mi fokac

7 Ŋoŋerao dâŋgie fuaekac izi miti-ŋeŋic bawahaekac. Gâcnezi wiac hehesicne me bâbâsifucne eŋarezo murâ eŋarepie ŋifecpeaŋ fozac me¡ 8 Ŋoŋe ine ŋaŋac wiac hehesicne â fiuc serereŋ eeŋgopieŋ, ehuc mitio qomâfâc-ŋeŋic mâmâc ejareeŋgopieŋ. 9 Sâqocne bapazi Anuture uucmaŋko rarašine mi fokac, i mi manaŋgopieŋ me? Ŋoŋe maŋŋeŋic mi eatuckeniŋ, sau bapa, me bawe qaŋgec babaju, me ŋokac ba behecne, me sasecŋic, me ŋiczia mamakâc eec eene, 10 me fiuc roro, me bâkiri bapa, me maŋsifuc opâ nâ areŋ eene, me dâŋ bâbâiŋ, me kâŋgâc rohuc šika qaqa, iŋucnezi Anuture uucmaŋko mi rašiniŋmu. 11 Eme gâcne ŋoŋe mârâc sâc iŋuc hâcne jujumbieŋ ši ine šurec-ŋopakicne â maŋfuru bacŋopakicne â kiŋfâsâc bacŋopakicne. I Wofuŋ-nâŋec Jesu Kristore šâŋe bajueŋgopieŋte â Anutu-nâŋecte Mârohec jueŋgopieŋte iŋuc eŋarekicne.

Sasecte uŋdâŋ

12 Wiac sasawa eene fonarekac, erâ wiac sasawa epe izi sâcne mi baficnuocmu. Wiac sasawa eene fonarekac, erâ wiac moczi ŋicbomboŋ enareme irec kiŋaŋ qaqa juju ine misac. 13 Nânâ qowizi hobure biŋe â hobuzi nânâ qowire biŋe. Juku Anutuzi e â e mâmâc imac-jofame arictac enicmu. Sahaczi ine sasecte biŋe mâcne, i Wofuŋte biŋe, Wofuŋ e sahacte ru. 14 Eme Anutuzi Wofuŋ bâɋârewec iŋuc jaha tâpiri-ticnezi nâŋâc bâɋârec-nâpozokac.

15 Sahac-ŋeŋic Kristore kiŋaŋ qaqa, i mi manaŋgopieŋ me? Eme Kristore kiŋaŋ qaqa e weniŋuc qârisiepene sasecte kiŋaŋ qaqa eocmu? Iŋuc aricne. 16 Me ŋoŋe šiŋuc mi manaŋgopieŋ, ŋic moczi ŋokac sâqocne moctao qohotame jahe maŋ sahac mocjaha enicmu. Dâŋqâreŋ šiŋuc hâcne fokac: “Jahe jajaheczi mocjaha erâ junicmu.” 17 Á moc e Wofuŋtao qohotame ehec maŋ qâqâtâc mocjaha enicmu.

18 Ŋoŋe sasec boe sau dic bacnenšepieŋ. Ŋic moczi wiac hehesicne gâcne eocmu izi sahac-ticne mi heuaocmu, â boe sau eocmuzi ine e jahacne sahac bâbieocmu. 19 Me ŋoŋe šiŋuc mi manaŋgopieŋ, sahac-ŋeŋic i Tiri Mârore ufuŋ, e ŋoŋere sahacmaŋko ŋeŋe juju eocte Anutuzi râe-ŋarewec. Ŋoŋe maŋ sahac rune aricne. 20 Ŋoŋe furi-ŋeŋic rokicne. Irec sahac-ŋeŋiczi Anuture šâŋe biŋe dopeckezejec.